Psalm GKPS
Jenges ni in tanohta Simalungun
Tanoh na laingan jadi-jadian ni tangan ni Tuhan
Hatubuhan ni bagei masam ni suan-suanan
Panggargaran ni pinahan talun ampa harangan
Riris dolong-dologni, marsipatuduhkon siromni
Irik marsikawahan, songon na marsihirdopan
Talun ni pe ampar songon apei na bayu
Tongon do tanoh Simalungun na tarpasu-pasu
Halak Simalungun, basar janah unjah manisei
Porman bani abak janah parholong atei
Lampot marsahap ge sipata malampei
Tapi halak na pentar, na pandei-pandei
Puji ma Jahowa ale Simalungun
Na hinan dadap-dadap mardalan bani gaholapan
Na manlangkah bani nalngkah na so martujuan
Mandalani dalan na manuju hamateian
Tapi marhitei sondang na hun surga
Dihut ma hita parsimada bani harajaon ni Naibata
Bungkas do hita, bansah humbani uhuman simagira
Ai mabungkar do sagala uti-utian na so marguna
Tarimakasih ma Bamu ale Jahowa
Na marsuruh parambilan mamboan Barita na maharga
Barita malas ni uhur na roh hun surga
Hun rumah ni Bapa sitompa langit, tanoh ampa jolma
HataMu na gok kuasa, gabe marpangarusion hanami
HataMu sibahen halongangan, gabe hagoluhan rupei nami
HataMu pamalum na borit, sipahisar tonduy nami
Ale pagori ni GKPS na martuah
Hulanan na bolon na dob pinaluah
Abakkon ma na madear tanda ni na dob mubah
Ulang halani na otik, dob ni use gabe matah
Lambin dokah, lambin talarni
Lambin taridah ma pangkorhonni
Marjongjongan ma parsikolahan
Tambah ma parbinotohan
Roh buei ni ma dalan na bolon
Buha ma panonggor dompak hamajuon
Manggargar pinahan, marbuah na sinuan
Torsa parhorjaan, pintor paruhuran
Lampot parsahapan, porman ‘ge abakan
Dear panriahan, dompak surga homa pardalanan
Roh ma ham hu parguruan
Hu rumah panumbahan bani Tuhan
Boan galangan na gabe parsombahan
Haganup na dong bamu ma ondoskon
Ulang be holsohan, ai Tuhan do pangaduan
Batar-batar pangondingan, ampa tanduk haluahon
Palurlur ma soramu, pajenges panortormu
Langkahkon ma langkahmu, puji ma Jahowa sadokah goluhmu
Jesus do Dalan, Hasintongan pakon Hagoluhan.
---
(iputik hun Liturgi Kebaktian bani Minggu Kemitraan GKPS, Minggu 28 Mei 2006)
0 Comments:
Post a Comment
<< Home