BUDAYA DO NA PALEGANHON SUKU BANGSA

Age pe domma gabe sada bangsa hita Indonesia, tong do isurahon ase ulang namin lambin masab suku-suku bangsa ni Indonesia on. Age palegan-legan tapi hot marhasadaon. Sura-sura in ma na igoran Bhineka Tunggal Ika.
Budaya na palegan-legan do mambahen dong suku-suku bangsa in. Anggo itadikkon sada suku bangsa ma budaya na paleganhonsi humbani suku bangsa na legannari, sasap nari mando suku bangsa in.
Aspek budaya na takkas taridah paleganhon suku na sada humbani na legannari, ai ma sahap, adat pakon kesenian. Tarlobih bani suku-bangsa Simalungun, aspek budaya na tolu in mando mambahen targoran ia suku bangsa. Anggo lambin lang be ihargahon sahap Simalungun, lambin roh simouni ma suku bangsa in. Anggo lambin lang be taridah hinalegan ni adat perkawinan ni Simalungun, hira dos mando songon adat ni simbalog (Toba), lambin roh langni ma suku bangsa Simalungun. Anggo lambin tading ma inggou Simalungun, rosuhan bani inggou suku na legan (atap India?), roh sasapni ma suku bangsa Simalungun.
Sedo hasusuran parmorgaon tang napataridahkon suku bangsa Simalungun. Ai anggo hasusuran do, lang tartakkasi be atap susur hunja hinan do halak Simalungun. Lang homa ongga tarbogei legenda na makkatahon sisada hasusuran hinan halak Simalungun. Gariada, dong do halak Simalungun na martongon susur hun suku bangsa na legan. Dong do na susur hun Pagarruyung, gabe Purba Tambak dob i Simalungun. Dong na susur hun Pakpak (Dairi), gabe Purba Pakpak dob marhuta i Purba; gabe Girsang dob marhuta i Nagasaribu. Dong do par Samosir hinan gabe Saragih barang Sinaga atap morga na legannari dob i Simalungun. Ai ma ase age dos morgani, lang mittor boi hatahonon sisada hasusuran.
Budaya do namin age parmorgaon. Tapi budaya adat perkawinan do rahut-rahut ni parmorgaon i Simalungun. Ai age pe palegan morga, boi do gabe sanina (sapanganonkon) bani parhundul i loulouan paradaton, halani sanina inang, sanina inangtua atap sapambuatan (boru).
Ai ma ase budaya ma tang na boi bahenon gabe batar-batar pasayurhon suku bangsa Simalungun. Sedo hasusuran. Age pe lang halak Simalungun hinan, gabe halak Simalungun do goranon anggo marbudaya Simalungun do. Sonai homa age suharni ai. Age halak Simalungun hasusuranni, mahol ma goranon ia halak Simalungun anggo budayani domma lang be budaya Simalungun. Humbani sapari do sonai. Ai ma ase sapari dong do na hun Toba hinan, atap na susur hun Jawa, hun Sina, gabe halak Simalungun halani ijalo janah ihagoluhkon budaya Simalungun; dong do na igoran “domma gabe malayu” halani na marbudaya Melayu. Sonari on pe boi do homa hataonkon “domma gabe Toba”, anggo domma marbudaya Toba, age pe namin halak Simalungun hinan do; “domma gabe Karo” halani marbudaya Karo. Atap, “domma gabe halak nasional” halani marbudaya nasional.


Catatan: Basa homa nasinuratkon ni St. Mansen Purba SH bani Ambilan & Barita GKPS No. 337 Mei 2002