BUAL SIMARINJAJA I ALAMAN NI GKPS CIKOKO

Marsangaja do si Eben roh hu Lokakarya ‘Memberi Secara Kristen’ nanidongkon ni GKPS Distrik VII i GKPS Cikoko, ari Saptu, 1 April 2006. Ai girah do hupatugah bani marhitei sms, na laho pamasaon Lokakarya in. Nikku do hu bani:’Anggo sihol idahonmu tulangmon manluar i loulouan, roh ho’. Irik homa hupatugah, na dob marpussa kontrakhu marhorja i Jakarta, halani ai laho mulak ma au hu Medan. Rusak au, anggo lang saud hanami pajuppah sanggah i Jakarta au, ra dokah nari ma ase boi pajuppah. Hape arap tumang ma uhurhu ase pajuppah bohi hanami. Domma namin takkas marsitandaan hanami. Ipungkah ma ai marhitei parbualan mar-sms, parbualan i milis BarSim (barita-simalungun@yahoogroups.com). Hutandai do homa Bapani, dob huidah gambarni i ‘Sarimatondang Na Laingan’ (THE BEAUTIFUL SARIMATONDANG, http://sarimatondang.blogspot.com). Ai sanggah Ketua Umum ni Pemuda GKPS au sapari, Bapa ni si Eben do Ketua Pemuda GKPS Resort hun Sarimatondang. Ongga do homa hanami rap Anggota Synode Bolon GKPS. Si Eben pe domma takkas itandai au. Naidah do ai humbani nasinuratkonni pasal au i ‘blog’ ‘Sarimatondang Na Laingan’ na ginoran nokkan. Tapi anggo na pajuppah bohi lape ongga hanami.

Lang huidah sandihari si Eben roh hu Lokakarya in. Joljol, ijuppahi ma au sanggah na hulakkahkon hu alaman ni gareja sihol mangissop tokkin panorang pasarankon Lokakarya in. Lang pala takkas hudingat sonaha nini manisei au, halani joljol do. Sonin hubotoh si Eben ia do hape in, nikku ma:’Dos go gakni ganjangmu pakon Bapamu’. Ai huagan hinan do ganjangan ia marimbang Bapani. Hape tarmados dassa. Parsirom ni bohini pe dos songon Bapani.

Dob hupatandahon si Eben in hu bani inang-i-rumahku, huarahkon ma si Eben hu alaman ni gereja. Ase boi marbuali irik mangissop. Hape lape soppat hanami marbuali, roh ma homa sada Pandita (na sanggah ‘studi lanjutan’ i STT) sihol marsahapkon au. Tias ma huidah si Eben halani marsattabi do Pandita on. Gabe nasinahapkon ni Pandita on do use ibualhon hanami, Pandita on, au pakon si Eben. Ai pe homa lang soppat tarpaganjang parsahapan, halani juppah ma use panorangni manoruskan horja ni Lokakarya in.

Dob marpussa Lokakarya, sanggah manrattam mulak ma, iarahkon si Eben ma hanami – au pakon inang-i-rumahku, hu alaman i lobei ni gareja GKPS Cikoko. Nini sihol ia mambuat gambarnami na dua marhitei kamera ni HP-ni.

Dob na margambar on hanami i lobei ni gareja, huarahkan ma si Eben hu alaman appit siamun ni gareja. Nihurhu ase ijai lobei hanami hundul-hundul, gendo soppat marbual apala tokkin, paima mulak.

Hape, sanggah lolou i alaman siamun ni gareja in piga-piga Pandita pakon piga-piga Sintua. Marsiseian ma hanami pakon sidea in. Ai tinandaan do ganup sidea in. Dob marsiseian, irik ma homa marhuriai hanami pasal nasinahapkon bani Lokakarya nokkan. Gap marhuria, gabe lang saud use marbual padua-dua pakon si Eben. Ai ia pe homa huidah marosuh do pabogei-bogei bual simarinjaja in.

Lape piga dokah, roh ma homa use Pandita Edison Munthe, Ephorus GKPS hinan (sonari Pandita Resort GKPS Cikoko). Itoppuk ma abarakku humpudikku manisei au. Dihut ma homa ia bani bual simarinjaja in. Gabe mariah tumang. Hassi pe songon na ‘rapat jongjong’ nidokan do. Lang naahapkon, marngayot ma pala bitis, akkap hesekni bual simarinjaja in.

Halani lang dong ‘moderator’ na manguluhun parbualan in - goranni pe bual simarinjaja do, boi do marhujai hujon - sonai ma hanami marsiluarhon luarni pasal GKPS, pardalananni pakon paruttolonni sadokah ni on, anjaha sonaha mandoppakkon panorang na laho roh on. Hassi pe parbualan in marbona humbani na dob iputushon Synode Bolon ase padalanon ‘parpuluhon’ i GKPS, hira marganjang do parbualan das hu bani struktur.

Pori dapot uhur ni si Eben manikkup parbualan in marhitei HP ‘Communicator’-ni, ra nihurhu buei do na maharga dapot humbani bual simarinjaja in. Au sandiri, age pe namin dong do “Communicator’-hu (sibere-bere ni niombah), lang dapot uhurhu manikkup sipsip. Ai pe maningon sipsip do itikkup. Ai pori tarbotoh dong na manikkup parbualan in, lape tottu sonin puar-puarni manluarhon sahapni.

Age pe namin hira na pasaksakkon parbualan sanggah Lokakarya nokkan do bual simarinjaja in, tapi ijin ma huparbois manluarhon na sihol luarhononku hinan i Lokakarya in ambit sukkup panorang, anjaha pori dong (na dapot uhurni anjaha pag) manukkun. Ai ma ase au do gobagan i loulouannami na marbual simarinjaja in. Ibaratni gonrang ondi, hira na mangindungi do Pdt. Edison Munthe, Pdt. Martin Lukito, Pdt. Anwar Tjen (GKPI), mongmonganni piga-piga Sintua.

Boi do namin hupatorang aha na dapot au humbani naniluarhon ni hasoman bani bual simarinjaja in. Tapi halani bual simarinjaja do goranni, hurang tama do anggo napatongah ai ijon. Lang tarsibar atap huria-huria ni do naniluarhon ni in, atap napasoru-soruhon do hansa, lang humbani borsih ni uhurni.

Ai ma ase nahuluarhon ma hassa hupatongah ijon. Deba ma ai songon na pasaksakkon na dob hupadas i Lokakarya. Debanari songon na mambalosi sungkun-sungkun na ipadas sanggah bual simarinjaja in.

Pasal ‘mambere’ hu gareja, targomos do huhatahon, domma dong tradisi na dear i GKPS sadokah ni on. Ai ma ‘galangan’ sanggah kebaktian; ‘gugu tahun’ siotikan 2 kaleng omei (hassi pe bani pandalanhonon, hira mardosdos do pitah siotikan ai hassa ibere, hape namin dong do na boi anjaha patut mambere gugu tahun na saguni, saluhutan, sahobon); ‘banggal ni uhur’ hu bani bagei-bagei ujuanni (hu Sending, hu Sikolah Pandita, hu Seksi, hu Pembangunan, hu Pandita/ Penginjil/Parhorja Kuria, pnl.); hu kas ‘idop ni uhur’, hitei mardingat na patut siidopan; ‘siluah’ hu bagei-bagei ujuan. Naidah, tradisi in do mambaen boi songon sonari on GKPS. Halani ai, na porlu patakkason, ai ma sonaha ase lambin sittong humbani malas ni uhur anjaha humbani ahap hasadaon (persekutuan) padashon pembere ni pagori ni Kuria in. Dihut ma ai marhitei naginoran ‘transapran’, tidak parduiton ni Kuria ase riap mambotoh.

Pasal ‘parpuluhan’, hira pag do au manghatahon tradisi na ijia do hassa in. Tongon dong do tarsurat pasal in bani Bibel. Tapi nihurhu lang ganup na tarsurat bani Bibel bahenon gabe aturan ni Kuria. Sipadason do Hata ni Naibata pasal ‘parpuluhan’ in hu pagori. Tapi lang maningon ibaen in gabe aturan. Halani anggo soppat ibaen gabe aturan, na maningon dalanhonon ma ai, anggo lang idalanhon, dong ‘uhum’ (atap ‘sanksi’) sipahonaon. Ulang attara ‘parpuluhan’ nidokan in, gari hu bani na so manggalar gugu tahun (na dob igoran ‘iuran’) pe lape tarpahona ‘uhum’/’’sanksi’. In homa, ise ma na boi mamareksa na dob ‘parpuluhan’ni do ibere? Ai lang mardabu-dabu bani Naibata do hassa?

Sonai age parbagi ni ‘parpuluhan’ in. Gan, itottuhon do piga persen soh i Kuria, piga persen stor hu Resort, piga persen hu Kantor Pusat. Gabe tubuh ma sukkun-sukkun, aha ma parayakan ni ‘parpuluhan’ in i Kuria, i Resort, i Kantor Pusat? Ia ‘parpuluhan’ itontuhon piga persen ‘berean’ ni Kuria, Resort, Pusat, mase duit na roh na legannari ai lang sonai sistemni? Hurang do namin dearni mardua sistem parduiton i GKPS.

Pasal na dob gabe ‘aturan’ pasal ‘perpuluhan’ in i GKPS, gabe huondolhon ma ase pakkei manombei aturan. Anggo hira lang tuk gogoh padalankon aturan, dearan do ipaturut ‘na patut dalanhonon’ in gabe ‘norma’ nidokan, ulang ibaen gabe aturan. Ai anggo soppat gabe aturan, anjaha lang torsa pandalanhonon, lang holi marhidorat (‘berwibawa’) aturan in. Sitombei aturan pe – Synode Bolon atap Pimpinan Pusat - gabe lang use dong ‘wibawa’ni.

In homa, hira mambaen aturan do hansa ibotoh hita, tapi lang tarpandapoti hita aturan in ibagas pandalankonon. Usihanni: ibaen hita do ijia aturan ia hataridahan ni hasadaon sa GKPS ai ma i Kuria (‘GKPS sebagai persekutuan diwujudkan dalam bentuk Jemaat-Jemaat’ – Pasal 8 Tata Gereja). Hape manambahi Resort do iparleilei hita. Ai marhitei ‘pemekaran’ Resort. Hira hasadaon sa Resort do use hataridahan ni hasadaon sa GKPS. (Hape namin gakni ase dong do ‘jabatan’ struktural ni Pandita, sedo na manambahi Pandita hu Jemaat-Jemaat). Dob ni, sonari madohor 400 halak ma Anggota Synode Bolon, hape sanggah hanami sapari, mar 100 halak. Hape bahat ni pagori ni GKPS otik do hassa tambah. Halani buei ni Anggota Synode Bolon in ma homa mambaen songon na mar-‘rapat umum’ i tanoh lapang use Synode Bolon GKPS. Pitah dua hali mando homa marrapot ibagas na lima tahun.

Domu hujin ma homa ase pasal ‘struktur’ ni GKPS pe porlu ma pakkei use itakkasi. Porlu ma ipatakkas use, hasadaon sa ‘synodos’ sa GKPS do siparayakon, atap hasadaon sa Kuria do. Sonai do age pasal rapot-rapotni. Rapot ni pagori do manontuhon aha silahoan, atap rapot ni Parhorja ni Kuria do. Saor ibotoh hita, sadokah ni on hira Parhorja do simada lahoan ibagas ‘struktur’ ni GKPS, ai ma rapat Majelis Jemaat (maranggotahon Parhorja), rapat/Synode Resort (maranggotahon Parhorja), rapat sa GKPS (Synode Bolon) (maranggotahon Parhorja, ai ma utusan Resort). (Pakkorhon ni in ma gakni ase songon na marlumba halak jadi Parhorja, marlumba ase utusan (ni Parhorja) hu Synode Bolon. (Hassi pe namin sanggah mangangkatsi gabe Parhorja, igoran do ‘pandiloon’ ni Naibata do in, idilo/ipilih marhitei Rapat ni Anggota Kuria).

Sonai ma homa age na igoran Pengurus i Kuria. Isuratkon do namin bani Tata Gereja, ia naginoran Pengurus ai ma Majelis Jemaat. Hape bani pandalanhonon hira Pimpinan Majelis Jemaat (Pengantar Jemaat, Wakil Pengantar Jemaat, Sekretaris, Bendahara) do hassa na igoran Pengurus. Parhorja na legannari ai hira anggota rapot do hassa. Sonaha boi araphonon parhorja na legannari in parsimada bani horja pakon lahoan i Kuria? (Taridah do ai humbani parroh ni Parhorja hu Lokakarya in, dong do tar 410 Parhorja i tolu Resort: Cempaka Putir, Cikoko, Bogor; sipanganon na ipasirsir tar 150 halak do; hape na saud roh tar 60 halak do).

Sonai do age pandalanhonon bani Peraturan Penatalayanan Keuangan GKPS. Ningon hinan (iaturhon ibagas aturan) ase tipak ma ipadas galangan romban hu bani ujuanni. Hape buei do Parhorja na mangagu Galangan I (ujuan hu GKPS) pakon Galangan II (ujuan hu Kuria), dob ietong, ai ma ibagi dua. Hape namin, somalni bahatan do na dapot humbani Galangan I ase Galangan II. Lang be na tipak goran ni ai, tapi na lepak (korupsi) do.

Lanjar ijin ma homa hupadas sukkun-sukkun na dob dokah marmotmot ibagas uhurhu, mase ma nani hira ‘umum’ hassa hapanditaon ni Pandita i GKPS, lang ibaen bei ‘spesialisasi’-ni romban hu bani na iporluhon ni pagori ni GKPS: dong na pabagaskon habotohon pasal budaya Simalungun (paradaton, sahap pakon inggou), dong napabagaskon habotohon pasal penatalayanan keuangan gereja (dihut ma ai ‘tradisi memberi’ ni budaya Simalungun), dong napabagaskon habotohon pasal ekonomi (ni parjuma/parboniaga/sipangan-gaji), dong na pabagaskon habotohon mar-organisasi (sosial, ekonomi, age politik), pakon bidang na legannari. Tong do ia Pandita (age horjani), tapi dong ‘halobihan’ni bei, lang ‘pandita habian’ hassa (sattabi).

Dob tarahap ma ngayot ni nahei na ‘marrapot-jongjong’ in, dobni ipukkahkon Pdt. Martin Lukito Sinaga ma surut hun loulouan bual simarinjaja in. Ibaen ma lappani halani laho manaruhkon Pdt. AnwarTjen pe ia. Dob ai surut-surut sada ma hanami. Iarahkon si Eben ma hanami hu mobilni, ase rap mulak hanami. Dob itaruhkon si Eben hanami hu kohomannami i Rusun Benhil II, mulak ma homa ia hu rumahni, hassi pe namin lape sombuh uhurhu marbuali pakonsi.