LOPOU NI MANSEN PURBA SH

Ase hubahen pe lopou on aima ase dong ianan manippan lanjar paradeihon nahusuratkon sadokah ni on pakon na laho roh. Sonai homa do age tulisan atap surat ni halak pasal na huparadei in, lang tarsibar atap boi iparujahon simbuei. Hira songon perpustakaan ma on, gariada boi homa do holi gabe ianan mardiskusi.

My Photo
Name:
Location: Medan, Sumatera Utara, Indonesia

Bani KTP-ku tarsurat do: Nama lengkap: Mansen Purba SH; Jenis kelamin: Pria, Tempat/tgl. lahir: Pematang Raya, 03-06-1937. Kawin/Tidak kawin: Kawin; Agama: Protestan (ai ma Kristen Protestan); Pekerjaan: Dosen IKIP Medan (hape namin Pensiunan Pegawai Negeri Sipil, ai domma humbani tahun 1972 nari au pensiun hun IKIP Medan); Alamat: Jl. Karya No. 155; RT/RW: Lk XI; Kelurahan/Desa: K. Berombak ; Kecamatan: Medan Barat). Piga-piga hasoman na umposo, sonon do nini au: "Pak Mansen adalah tokoh awam Gereja dan tokoh budaya Simalungun yang bagi saya menjadi sumber inspirasi dan Guru." (Elvina Simanjuntak, aktivis gereja, tinggal di P. Siantar). "Tak berlebihan bila saya merasa MP dalam waktu yang singkat telah menjadi Guru bagi saya. Guru dengan G besar. Ia menjadi Guru bagi saya tentang Simalungun, tentang bagaimana 'menjadi dan sebagai' orang Simalungun yang oleh orang Simalungun kerap diartikan sebagai MarSimalungun." (Eben Ezer Siadari, wartawan) Jadi ise do ahu sasittongni? Nasiam ma simada balosni, dobkonsi ibasa nasiam nahusuratkon i lopou on. Diatei tupa ma.

01 October 2005

PARUNJUKON (PERKAWINAN)

Dearan do anggo palobei na tulimati panggoranion ni bagei horja adat na marpardomuan bani parunjukon, ai ma na igoran perkawinan bani sahap Indonesia.
Dong piga-piga panggoranian na ipakei bani adat perkawinan Simalungun. Deba ma ai:
marhajabuan, marbona humbani hata jabu (=rumah); artini: marrumah-tangga;
mambuat boru, ibuat boru ase dong parinangonni; hunjin ma roh panggoranion binuatni mangkatahon parinangonni, hansi pe anggo bani parsahapan adat lang talup ipakei;
marunjuk, manlahoi horja adat na pasaudkon parrumah-tanggaon i rumah ni paranak;
moppo, dalahi na manlahoi adat parunjukon;
marpanayok, naboru na manlahoi adat parunjukon i rumah ni simatuani;
Humbani panggoranion in, mintor paltak ma arusan, marhitei na marunjuk hape gabe marrumah-tangga ma dalahi pakon naboru; marhitei na marpanayok, mubah ma hajongjongon ni naboru na marpanayok in gabe parinangon i rumah ni paramangonni, lang be anakboru hajongjongonni; marhitei na moppo, mubah ma hajongjongon ni na moppo in gabe paramangon ni parinangonni, lang be garama ia.
Horja-horja parunjukon in ihasuhutkon paranak, ipamasa sonin das boru na laho marunjuk in i rumah ni paranak. Ia sonaha pe adatni ibahen boru in laho manlakkah hu jabuni (=laho kawin), barang na ipaikkat dear, atap pe naniasokan, barang marlua-lua, dos do horja parunjukonni i rumah ni naniayakanni. Ai ma:
a) ibulangi, sonin das anakboru na laho marpanayok in i horbangan atap i alaman ni rumah ni dalahi niayakanni;
b) manlangkahi rudang saidangan i andar, sonin laho takkog hu rumah; (hassi pe sapari mando ai, paima roh agama (Kristen atap Islam));
c) marhoras-horas, sonin das i rumah;
d) ipahundul i luluan, bani apey na bayu;
e) ijujungi boras tenger;
f) padalan demban na bayu; demban paubah tutur;
g) manurdukkon indahan dapoton; lanjar irik ma mangan riap;
h) padashon hiou siluah.
Hunjin naidah, horja-horja in do na pasaudhon partongah-jabuon ni siparunjuk. Tarlobih ma ai, dob ibulangi siparunjuk naboru, gabe lang be anakboru ia, tapi parinangon ma, halani bulang do tandani na dob marhajabuan naboru. Sonai do age na ijujungi boras tenger; hunjin ma botohon na dob gabe inang (na bayu) na marpanayok in. Sapari, lang tarolati be boru na iluahon anggo domma soppat ijujungi boras tenger i rumah ni na manluahonsi. Tapi anggo lape ijujungi boras tenger, boi pe na langlangi, marhitei na iruttahon mulak. Ai ma ase sirsir do marpandihar manluahon boru sapari.

Humbani parlaho ni boru borhat hu parunjukon pe, bagei do panggoranion. Deba ma ai:
laho, makkatahon misir marunjuk, hassi pe namin arti ni laho ai ma misir, borhat;
palaho boru, ai ma horja-horja na ipamasa ni parboru laho paborhatkon boruni laho marunjuk;
alop dear, makkatahon gok do adatni sanggah roh odoran ni paranak mangalop boru in;
marlua-lua, ai ma anggo misir tumang hassa boru in laho hu parunjukonni, dob idalankon adat marlua-lua, ai ma na itadikkon dembanni bani parborasan na gabe tugah-tugah na marlua-lua ia;
na pinaikkat dear, ai ma anggo gok do adatni ibahen parboru laho paikkatkon boruni laho marunjuk;
parpaikkat, ai ma ugasan (omas, hudon, apey, pnl.) na ibere parboru sanggah paikkatkon boruni marunjuk.
Humbani panggoranion in pe mittor takkas do arusan, horja-horja parlaho ni boru dassa hapeni ganupan in. Lape horja parunjukon. Goranni pe adat palaho boru do. Lang dong panggoranion paunjuk boru. Ai anggo horja parunjukon, holi pe dob das i rumah ni paranak. Ai ma ase itappeihon dassa bulang hu panjujungni, lang ibulangkon. Marobu do nabulangi borudiri. Ai anakboru pe ia sanggah napaikkat, sedo na dob marbulang (=na dob gabe parinangon), Na laho parumaendiri do sibulangan. Ai ma ase dob das i rumah ni simatuani pe holi ase ibulangi, tanda ni na saud ma ia gabe parinangon i rumah ni paramangonni.

Humbani panggoranion in mintor takkas ma homa taridah pakkorhon ni parunjukon. Ai ma na mubah hape hajongjongon ni siparunjuk in. Garama hinan si dalahi, gabe parbapaon ma. Anakboru hinan si naboru, gabe parinangon ma.
Marhitei parunjukon in ma homa gabe sipadihuton sidea bani loulouan paradaton. Taridah do ai humbani na igorankon sidea domma marhundulan anggo domma marunjuk. Ai anggo lape marunjuk, lape dong hundulanni bani loulouan ni paradaton, age pe domma torasan. Ai ma ase ihatahon do homa, jol pe ope anggo nape marhajabuan, lape jolma.
Marhitei parunjukon in ma homa itontuhon parhundulni bani houhouan ni paradaton. Gabe sibiak sanina ma sidea i rumah ni paranak, gabe sibiak boru sidea i rumah ni hasuhuton parboru.
Gabe inang (na bayu) ma naboru siparunjuk in i louloun hasuhuton paranak, anjaha sibiak boru mando ia i loulouan ni hasuhuton parboru, age pe namatorasni do namin in. Irik homa sanggah parunjukonni in ma sah botohonni ise simatuani panukkunan podah, ise parbapatuaonni na manguluhon horja paradatonni, ise parnasikahaonni hasomanni manriah, ise anakboru-jabuni na manukkoli parrumah-tanggaonni. Ai maningon batur ma ganupan in taridah sanggah horja-horja parunjukonni.
Isurahon namarhajabuan in do ase tubuhan tuah sidea, tubuhan anak pakon tubuhan boru. Tapi sura-sura in pe orod tumang do pardomuanni pakon sura-sura laho pasayurhon parhundulni bani loulouan paradaton. Ai isurahon do ase anak ni in holi manambat lahoanni bani paradaton, anggo matua ia. Sura-sura in ma na manjuljulsi paoppohon anakni, palahohon boruni. Dob marhajabuan bei pe holi niombahni in ase salosei iahap horjani, ase goranon ia na sayur matua anggo marujung ma goluhni.
Sadalan hujin ma homa ase palobei iboan do anakni mamuhun hu bani tulangni, bani na laho marboru legan anakni in, lang mangulaki boru tulang. Sonin holi dob saud parunjukon ni anak ni in, iulakkon ma use patandangkon parunjuk in hu rumah ni tulangni, ase iboruhon tulangni in parumaenni on, ase anakni in holi manambat parhundulni gabe boru i rumah ni tondongni in.
Sonai do homa anggo tiba ma masani palaho boru. Anggo sedo maranak-ni-amboru boruni in, ipodahkon do bani siparanak na laho mangalop boruni in ase tiba anakborujabu ni parboru. Sanggah maralop pe holi, palobei isukkunhon do atap domma ipadalan paranak parhombaranni hu bani anakborujabuni. Ai marhitei parhombaran in do ase hombar holi parhundul ni boruni in pakon sibiak boru na legannari, ase ginoppar ni boru ni in holi gabe sibiak boru bani loulouan paradatonni.
Sonai ma parsayurni houhouan pardiha-dihaon marhitei parunjukon. Lang pitah pasayurhon tumang, tapi dihut do pabolagkon. Ai marhitei parunjukon, gabe mardiha-diha ma paranak pakon parboru. Marihutkon sidea ma homa gabe mardiha-diha ganup diha-diha ni paranak pakon ganup diha-diha ni parboru.
Hunjin ma takkas taridah, ihorhon parunjukon hape jongjong partongah-jabuon, anjaha marhitei partongah-jabuon gabe pasambat pardiha-dihaon, na pasayurhon age na pabolagkon. Lang marnarotap pardiha-dihaon halani igassihkon niombah do lahoan adat ni namatorasni, marsundut-sundut. Paling ma roh daohni, tapi lang anjai rotap. Lang marsittig bolag ni pardiha-dihaon hinorhon ni parunjukon. Ra, pori iirik-irik partalian ni pardiha-dihaon, ganup do samah Simalungun mardiha-diha.
Hunjin ma homa taridah hinaporlu ni padalankon adat bani horja parunjukon. Ai marhitei horja adat in ma marsijaloan na sada hu bani na sadanari, irahut parhundul bani loulouan paradaton. Anggo lang ipadalan adat perkawinan ni Simalungun, lape hataonkon marsijaloan tutur. Boi do tongon dong dalanni pardiha-dihaon, tapi lape marsijaloan. Pori napaulak hu bani hata nokkan, lape marpakkorhon halani lang ibagas adat.
Ai ma ase tang nasinurahon marhitei parunjukon, ai ma ase masuk sidea bani loulouan pakon houhouan ni paradaton. Ase hona etong sidea ibagas masyarakat adat. Age pe isurahon do tubuhan anak pakon tubuhan boru, boi do hatahonon sura-sura na pahotkon hajongjongonni do in i loulouan ni paradatan. Ai age pe lang tubuhan tuah parinangon na dob marunjuk in, hot do hajongjongonni gabe inang i loulouan paradaton ni paramangonni. Hot do homa parhundul ni in porini marujung goluh paramangonni.

0 Comments:

Post a Comment

<< Home